Onne, njuhčâmáánu lovváád peeivi, Ummeest Ruotâst lii sämikonferens. Anarâškielâ fáálá ohjelmin tiäđu Čyeti čälled -proojeekt ovdánmist.
Mist lii lamaš nettikoijâdâllâm tast, maid ulmuuh halijdiččii čäälliđ. Puátuseh láá tääl valmâštum. Ulmuuh tuáivuh kielâlii iše tego e-sänikiirjijd, kielâtivvoom já tivvoomohjelmijd, iše čäällimprosessân já mainâsij čälimân.
Tääl lii monâmin koijâdâllâm nubbe paje: Annika Pasanen jotá taan máánu ääigi (njuhčâmáánu 2016) pargosoojijn koijâdâlmin, magareh čäällimtáárbuh anarâškielâ sárnoo pargein láá. Kuálmád paje lii tastmaŋa taggaar, et ko taah puátuseh láá valmâšeh, savâstâlloo vala pargoadeleijei ovtdâsteijeigijn. Taan paje porgâv Erika Sarivaara já Marja-Liisa Olthuis.
Proojeekt lii meiddei hammiiškuáttám vuossâmuid versioid čäällimškovliittâsâst. Ulmuuh tarbâšeh čäällimistis sehe áámmátlii ete astoääigi iše. Astoääigi čäällim puáhtá pyereest pieijâđ Anarâškielâ siärván já orniđ tobbeen čäällimpáájáid já -riggeid. Áámmátlii škovlim ferttee orniđ sierâ.
Taa lii liŋkkâ sahâvuárun, mast muštâluvvoo koijâdâllâm puátusijn já vuossâmuin škovlimvisioin: Čyeti čälled_Ume_10032016.
Proojeekt haalijd lieggâsávt kijtteđ puoh taid pargoskipárijd já čälleid, kiäh láá maaŋgânáál ovdedâm proojeekt. Tasthân puoh vuálgá, et ulmuin lii já piso čäällimmohtâ.
Ei kommentteja:
Lähetä kommentti