SÄVNIEEHID
Ko pargo keežild vaaibâm
pááikán maasâm
Tuše sáávnum
vaibâmvuođâ meddâl;
Lieggâ säävnist
ko puudâ čokkáástâlâm
peeivi čuolmah ubânâssân vájálduveh.
”Tiskâl čääsi kivkkáháá oolâ !”
Lievlah suovân ááimun pajaneh,
Já tääbbin lii jo nuuvt kume,
”Vyerdi ! Ko moonâm vyeliláá čokkáđ !"
Tyelli tälli siisâ, olgos já maassâd,
forgâ ferttee tupán moonnâđ.
Kivkkáhâš, pääti, kukse, saibâ,
puáttee tove mij vala uáinip !
++
Eellim puudah
Tääbbin tavepieggâ
lii karsâm
must oovsijd,
puolâš páinám
vyeligubbon,
muotâ muttám
muu vááimu
timásubbon,
jieŋâkälleeh tiäddám
muu ruottâsijd
kieŋâlubbon
keđgijuovân
Já Säämi ulmui
čalmeh
láá šiärrám
ilo já soro
kirkis kälden
povvustâm
piäiváásuonjârijd
jieŋâcuoŋŋuu oolâ
kištoi riävskáigijn
kulluuttâm
kiiđâ nahciis
vyeimi
kote skaamâ
vuáittá
- Heli Kinisjärvi 4.4.2016
Čäällimpuddâ
Puállupevdij cikkááttem
tiätuvuárkán kirdâččeijee puustaveh
jurduuh
jieškođe-uvlágáneh
Mondiet mun juáđháččim?
Lam-uv mun humo vâi viijses
ko tágárijd orniim?
Mast mun tom tiäđám
kiännii iärrás äšši meridiđ.
Jotteel vâi hiđes?
Ijhân tot ennust meerhâš
kohân tekstâ šadda.
Lappuustâm säneh
occojeh kiirjijn
teikâ kiännii uáivist
tassaažân ko kávnojeh
nuuvt et maainâs šadda
juátkoo
čálloo loopâ räi.
Pargomohtâ
tot kale piäjá joton
addel naavcâid
uđđâ ideaid.
Tái ulmui tiet mun vajam
já irâttâm
ain pyerebeht
ain uđđâsist.
Čepimuuh čälleeh
čalluidis siisâ čájádâm
povvâsteh, moijájeh
pargoidis ääigi
tiäđám
et čäällim puáhtá sijjân ilo
piäiválijn pargoin patârem
Kuárus pááppár kamo
čällee čepimus suorgâtteijee
juurdâšhánnáávuotâ
orostit ubâ proosees.
Tast jiem eidu tääl peerust.
Čälimân šadda himo
tego elimân kuás-uv
jurduuh juškeh jiešmeidlist
kukkeláá ko kunnâliäján
kuovlâdeh
kuus keččâmáin
ij mahten uáini.
MLO 26.2.2016
Ohtâvuotâ
Juálgám laavatuulâst
uáivám, oovcád plaaneet
váimustân lodderaidâlâs ritmâ
mii kulloo skáálžu siste
Sieidivääri alne uhredâm jieččân
Adelâđâm
Vääldi muu
Vááldám tuu
Muu häämi tego keđgi
tuu jävildum soolâst
Majemuš vuoiŋâstâs
Já huámmášâm
kuárŋoošaddoid suormâidân keejijn
Suonjâr
ES (čäällimpáájá)
Naharist sun ooinij jieijâs
lâi kiirdâšmin
keppisávt tegu kesipieggâ
oovtâst visârdijjee loddáiguin
tuubdâi jieijâs tivrâsin
rähistum nieidâžin
ráávhu tobdo váimustis
Siämmáá pyerrin
já siämmáálágánin
ohtâvuođâst obijguin.
Manen kolgâččij leđe siämmáá kievrâ
tegu siđhes pecimuorâ Aanaar suollust ohtuu?
Manen kolgâččij leđe siämmáá pissoo
tegu kuálhis jävri?
Manen kolgâččij viggâđ leđe
miinii eres
maggaar mun jiem lah?
ES (čäällimpáájá)
Pisánâm
Suorgâtteijee joskâdvuotâ
kolgâččim piergiđ jieččân
jurduiguin, tobdoiguin
älkkeb ličij
tuše
kárgáđ
ES (čäällimpáájá)
Ei kommentteja:
Lähetä kommentti